Unterhosen
D’Sach mit dr Wäschheichi

Ja, du heiligä Schtrausack, jetz fürchtäts mär denn ättä! Da heindsch doch chürzli im Fernsee ärzellt, dass mä z’Amerikä d’Undärhosä van da Nachpuurä nümä gsee well. Dass weeri eigäntli schon rächt, än Art äs Värhüätigsmittäl. Abär gmeint ischt diä Sach äbä ohni Inhalt. Gmeint sind nemmli Undärhosä uf dr Wäschheichi, gwäschni, subäri, i würti sägä, jungfräulichi. Abär nid nu zäb, äbä alläs ischt värbotä. Wäschheichänä übärhopt, ob jetz mid odär ohni Undärhosä.
Z’värücktä am Ganzä ischt denn no, dass au grad chürzli än Amerikanär, Al Gore heisstr, än Nobelpriis übärchoon hed. Und wägä was wool? Är hed än Film übär di Klimaärwermig gmachät, wa nisch äs uuvärdaalisch schlächts Gwüssni machä söll und nisch seid, dass nu ünschäs Läbä d’schuld sii an derä Miseerä. Mä fregtschi jetz natürli, wiä d’Amerikanär iri Undärhosä tröchnänd? Hä….mid däm Tömblär nemmli, und dr säb brucht tonndärli Schtroom! Asä, für mi geid da äswas nümä uuf.
In allnä Ziitigä chamäs läsä, im Radio ghörä und im Fernsee gsee: Jedi Modä van Amerika cheem früäjär odär spetär zun ünsch. Zäb chönnti denn scho no schtimmä. I hoffä abär nu, dass, wenn denn d’Sach mid dr Wäschheichi ämal übärhärä chon sötti, ünschi Hirni no funktioniäränd!

Seid d’Marietta Kobald

Erschienen im P&H im November 2007